सुमो दुर्घटना हुँदा १३ जना घाइते

कार्तिक ७-मकवानपुर, मकवानपुरको इन्द्रसरोवरमा यात्रुवाहक टाटा सुमो दुर्घटना हुँदा १३ जना घाइते भएका छन् । मंगलबार बिहान ३:३५ बजेको समयमा मकवानपुर ईन्द्रसरोवर-५ मकैबारीमा मधेस प्र.०३-००१ ज ०२८३ नम्बरको सुमो आफै अनियन्त्रित भई दुर्घटना भएको थियो ।

इन्द्रसरोवर-५ स्थित कुलेखानि मातातीर्थ काठमाडौँ सडकखण्डमा वीरगंजबाट काठमाडौँ तर्फ जाँदै गरेको उक्त सुमो सडकबाट करिब २० मिटर तल खोल्सामा खसेको जिल्ला प्रहरी कार्यालय मकवानपुरले जनाएको छ ।

दुर्घटनामा घाइते भएका उनीहरूको उपचारको लागि काठमाडौँ पठाएको प्रवक्ता भण्डारीले बताए । दुर्घटनामा घाइते भएका सुमो चालक बारा कलैया- २१ बस्ने वर्ष २५ को अनिल कुमार शाह भने प्रहरीको नियन्त्रणमा रहेका छन् ।