कवाडी टिप्ने एक वृद्ध मृत फेला, हत्याको आशंका

१० चैत- भक्तपुर, कवाडीको काम गर्ने एक वृद्ध मृत फेला परेका छन् । प्रहरीका अनुसार आइतबार बिहान ५ः५५ बजे मध्यपुर ठिमी नगरपालिका-९ बोडेमा एक वृद्धको शव फेला परेको हो।

बोडे निलबाराहीस्थित पिकनिक स्पोर्टको पार्किङस्थलमा खोटाङ केपिलासढी गाउँपालिका-२ का ६६ वर्षीय ओमप्रकाश राईको शव फेला परेको हो।

उनको दाहिने कान र टाउकोमा चोट देखिएको छ। प्रहरीले हत्या भएको आशंकामा अनुसन्धान अघि बढाएको छ।शवको मुचुल्का तयार गरी पोस्टमार्टमको लागि केएमसी अस्पताल पठाइएको छ, राई बोडेमै बस्दै आएका थिए। उनी कवाडीको सामान टिप्ने गर्थे।

हत्याको आशंकापछि प्रहरीले अनुसन्धान गर्ने क्रममा अहिलेसम्म कोही पक्राउ परेका भने छैनन्।