सञ्जालहब
२२ चैत- काठमाडौँ, शुक्रबार नेपाल विद्युत् प्राधिकरणको कार्यकारी निर्देशकबाट बर्खास्त गरिएका कुलमान घिसिङले आफू हतोत्साहित र उत्तेजित नभएको उनले बताएका छन्। चैत ११ को मन्त्रिपरिषद्को बैठकले उनलाई प्रबन्ध निर्देशक पदबाट बर्खास्त गर्ने निर्णय गरेको थियो। उनलाई बर्खास्त गरेर प्रबन्ध निर्देशकमा हितेन्द्र देव शाक्यलाई नियुक्त गरिएको छ।
राष्ट्रसेवक कर्मचारीलाई हतोत्साही बनाउने निर्णयले कतिपय खुसी भए पनि आफूलाई हारको महसुस भएको छैन, ‘एक कर्मचारीमाथि राज्यको सम्पूर्ण शक्ति कसरी खटिएको थियो भन्ने बारेमा जनता जानकार छन्। त्यसबाट म उत्तेजित र हतोत्साहित भएको छैन।’ मैले आफ्नो कार्यकालमा पछुताउनुपर्ने कुनै काम नगरेको दाबी पनि गरेको उनको भनाई छ।
सरकारका तर्फबाट आफ्नो मनोबल गिराउने काम भएको र संस्था र राष्ट्रपति घात गर्न आफ्नो इमानले नदिएको उनले बताए। उनले लोडसेडिङ अन्त्य गरेर आफूले कुनै चमत्कार नगरेको पनि बताए। घिसिङले भने, ‘यो त एउटा इमानदार प्रयास थियो।’ उनले केही स्वार्थ समूहबाट आफ्नो इज्जत र प्रतिष्ठामाथि विगतदेखि नै आक्रमण भइरहेको बताए।
उनले आफ्नो कार्यकालमा प्राधिकरण नाफामा गएको र प्राधिकरणको सम्पत्ति तीन गुणा बढेको बताए। नेपाल सरकारले बजेट नदिए पनि प्राधिकरणले आफ्नो स्रोतसाधनले बिजुली उत्पादन गरिरहेको उनको भनाई छ।
सर्वोच्च अदालतले बिहीबार घिसिङका पक्षमा अन्तरिम आदेश दिन अस्वीकार गरेको थियो। घिसिङ २०७८ साउन २५ गते कार्यकारी निर्देशकमा नियुक्त भएका थिए। उनलाई सरकारले कार्यकाल सकिनुभन्दा चार महिनाअघि नै बर्खास्त गरेको थियो। उनको बर्खास्तपछि प्रतिपक्षी दलले केही दिन सदन अवरुद्ध गरेका थिए।
प्रतिक्रिया दिनुहोस्