भाटभटेनी सुपरमार्केटमा लुटपाट गर्ने ९ जना सामानसहित पक्राउ परे

१७ चैत- काठमाडौं, राजावादी आन्दोलनका क्रममा काठमाडौंको तीनकुनेमा भएको प्रदर्शनकै बेला मौका छोपी भाटभटेनी सुपरमार्केटमा लुटपाट गर्ने ९ जनालाई प्रहरीले सामानसहित पक्राउ गरेको छ।

प्रहरीले ब्ल्याक लेबल, ज्याक ड्यानियल्स लुट्ने धनुषा घर भई कोटेश्वर बस्ने आशिष सिंहलाई पक्राउ गरेको छ। चार वटा बियरको बोतल लुटपाट गरेको आरोपमा सर्लाही घर भई कोटेश्वर बस्ने प्रेमकुमार महतोलाई पक्राउ गरेको छ। भारतीय नागरिक रविरञ्जन कुमार, नुवाकोटकी सुशिला कुमाल, धरानकी एलिसा राई र कोटेश्वरकी बालकुमारी कार्की पनि पक्राउ परेका छन्।

यस्तै फलफूल चोरेको आरोपमा सिन्धुपाल्चोककी निर्मला कार्की, सिन्धुलीकी चित्रमाया बस्नेत र सुस्मिता बराललाई समेत प्रहरीले पक्राउ गरेको छ ।

बरालबाट ६९ वटा लिपिस्टिक, एउटा ऐना, २१ वटा गाजल बरामद भएको छ। अन्य १२ वटा सामान पनि प्रहरीले बरामद गरेको छ।

उनीहरूमाथि थप अनुसन्धान गर्न प्रहरी वृत्त बानेश्वरमा पठाएको छ।