सडक मर्मत गर्दा एक्स्काभेटर पहिरोमा पुरिँदा चालकको मृत्यु

असोज २१-पाल्पा,  सडक मर्मत गर्दा पाल्पामा पहिरोमा एक्स्काभेटर पुरिँदा चालकको मृत्यु भएको छ ।

रामपुर नगरपालिका–१०, गेझा टोक्सेमा सडक मर्मतको क्रममा पहिरो खस्दा एक्स्काभेटरसहित पुरिँदा चालक शान्तिनगर गाउँपालिका–१, दाङका ३० वर्षीय धनबहादुर खड्काको मृत्यु भएको प्रहरीले जनाएको छ ।

गेझाको मिलन चौतारीदेखि टोक्से जाने पुरानो मोटरबाटो मर्मत गर्ने क्रममा सडकमाथिबाट खसेको पहिरोले बा २ ख १९५७ नम्बरको एक्स्काभेटरसहित चालक खड्कालाई पुरेको प्रहरी नायब उपरीक्षक सुगन्ध श्रेष्ठले जानकारी दिए ।

चालक खड्काको कम्मरदेखि तलको भाग च्यापिएको अवस्थामा प्रहरी र स्थानीयले उद्धार गरी तानसेनस्थित मिसन अस्पतालमा उपचारका लागि पठाएका थिए । चालक खड्काको उपचारका क्रममा सोमबार बिहान मृत्यु भएको हो । घटनाको सम्बन्धमा इलाका प्रहरी कार्यालय रामपुर र हुंगी प्रहरी चौकीबाट थप अनुसन्धान भइरहेको प्रहरीले जनाएको छ ।